भोटेकोशी बाढी : १७७ जनाको मृत्यु, ८२६ अझै बेपत्ता

काठमाडौं – रसुवाको भोटेकोशी नदीमा आएको भीषण बाढीका कारण मृत्यु हुनेको संख्या १७७ पुगेको छ। नेपाल प्रहरीको बिहीबार बिहान १० बजेसम्मको विवरणअनुसार बाढी प्रभावित विभिन्न जिल्लाबाट १७७ जनाको शव फेला परेको हो।

प्रहरीका अनुसार चितवनमा ६९, धादिङमा २७, गोरखामा २०, नवलपरासी पूर्वमा ३२, नुवाकोटमा १२, तनहुँमा ९, नवलपरासी पश्चिममा ६ र रसुवामा २ जनाको शव फेला परेको छ।

बाढीपछि ठूलो संख्यामा मानिस अझै सम्पर्कविहीन छन्। पछिल्लो सरकारी विवरणअनुसार ८२६ जना बेपत्ता रहेका छन्, जसमा सुरक्षा निकायका कर्मचारी तथा स्वदेशी–विदेशी पर्यटकसमेत छन्।

प्रभावित क्षेत्रमा नेपाली सेना, नेपाल प्रहरी र सशस्त्र प्रहरीको टोलीले खोज तथा उद्धारलाई तीव्रता दिएको छ। नदी किनार तथा प्रभावित क्षेत्रमा थप शवको खोजी भइरहेको प्रहरीले जनाएको छ।