भोटेकोशी–त्रिशूली बाढीमा ५४७ शव फेला, ९७७ जना सम्पर्कविहीन

काठमाडौँ- रसुवाको भोटेकोशी हुँदै त्रिशूली नदीमा आएको विनाशकारी बाढीपछि हालसम्म ५४७ जनाको शव फेला परेको नेपाल प्रहरीले जनाएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढी तथा पहिरोमा परी ९७७ जना अझै सम्पर्कविहीन छन्। बेपत्ता भएकाहरूको खोजी तथा उद्धारका लागि सुरक्षाकर्मी र उद्धार टोलीलाई प्रभावित क्षेत्रमा परिचालन गरिएको छ।

नेपाल प्रहरीले हालसम्म १ हजार ४७३ जनाको उद्धार गरिएको जनाएको छ। प्रभावित क्षेत्रमा नेपाली सेना, नेपाल प्रहरी र सशस्त्र प्रहरीको टोलीले खोजी तथा उद्धारलाई निरन्तरता दिइरहेको छ।

बाढीका कारण रसुवा, नुवाकोट, धादिङ, गोरखा, चितवनलगायत जिल्लामा ठूलो जनधनको क्षति भएको छ। सडक, पुल, जलविद्युत् आयोजना, प्रहरी चौकी, होटल तथा अन्य भौतिक संरचनामा समेत व्यापक क्षति पुगेको छ।

बाढी प्रभावित क्षेत्रमा ठूलो संख्यामा मानिस सम्पर्कविहीन रहेकाले आफन्तजनमा चिन्ता बढेको छ। बेपत्ताको खोजीलाई थप तीव्र बनाउँदै उद्धार तथा राहत कार्य प्रभावकारी बनाउन परिवारजनले सरकारसँग आग्रह गरेका छन्।