काठमाडौं – नेपालमा आएको विनाशकारी बाढीबाट भएको मानवीय क्षतिप्रति बंगलादेशको संसद्ले गहिरो दुःख व्यक्त गर्दै सर्वसम्मतिले शोक प्रस्ताव पारित गरेको छ।
ADVERTISEMENT
बंगलादेशी सांसदहरूले मृतकहरूप्रति सम्मान व्यक्त गर्दै एक मिनेट मौनधारण गरेका थिए। त्यसपछि दिवंगत आत्माको चीर शान्तिको कामना गर्दै प्रार्थना गरिएको थियो। धार्मिक मामिला मन्त्री काजी शाह मोफज्जल हुसेनले प्रार्थनाको नेतृत्व गरेका थिए।
ADVERTISEMENT
बंगलादेशी संसद्का सभामुख हाफिज उद्दीन अहमदले पनि शोक सन्देश जारी गर्दै मृतकका परिवारप्रति समवेदना व्यक्त गरेका छन्। उनले घाइतेहरूको शीघ्र स्वास्थ्यलाभको कामना गर्दै विपत्तिबाट प्रभावित नेपालीप्रति ऐक्यबद्धता जनाएका छन्।
यसैबीच, रसुवाको भोटेकोशी बाढीमा हालसम्म ९०३ जनाको शव फेला परेको छ भने ४ हजार २२७ जना अझै सम्पर्कविहीन छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार १० हजार ४५१ जनाको उद्धार गरिएको छ भने २६७ जना घाइते भएका छन्।
उद्धार, राहत तथा पुनर्स्थापनाका लागि नेपाली सेना, नेपाल प्रहरी र सशस्त्र प्रहरी गरी २० हजार ८१९ सुरक्षाकर्मी परिचालन गरिएको प्राधिकरणले जनाएको छ।
