पहिरो खस्दा नारायणगढ–मुग्लिन सडकखण्ड अबरुद्ध

चितवन–निर्माणाधीन नारायणगढ–मुग्लिन सडकखण्डको चारकिलो भन्ने ठाउँमा पहिरो खसेपछि सडक अबरुद्ध भएको छ । विहान एकतर्फी मात्रै खुलेको सडक खुलाउने क्रममा थप पहिरो झरेपछि अहिले दुईतर्फी नै अबरुद्ध बनेको जिल्ला ट्राफिक प्रहरी कार्यालय चितवनका प्रमुख सन्तोष पन्तले जानकारी दिए ।

मुग्लिनबाट चारकिलोमिटर नारायणगढतर्फ चारकिलोमा बिहान ५ बजेतिर पहिरो खसेको थियो । बिहानैबाट पानी परिरहेकाले पहिरो हटाउन समस्या भएको हो ।

पहिरो पन्छाउने काम जारी नै रहेको नारायणगढ–मुग्लिन सडक आयोजनाका सूचना अधिकारी शिव खनालले जानकारी दिए । केहीबेरमा सडक खुलाउन सकिने देखिएको खनालले जनाए ।

इच्छाकामना गाउँपालिका–६ स्थित चारकिलो भन्ने स्थानमा दुई दिनअघि मात्रै पहिरो खस्दा तीन घण्टा यातायात अवरुद्ध भएको थियो । यहाँ पटक–पटक पहिरो खस्ने गर्छ । हाल नारायणगढ–मुग्लिन सडक निर्माणको ९.४ प्रतिशत मात्रै काम पूरा गर्न बाँकी छ ।