“सैनिक परेडमाथि भएको आकस्मिक हमलाको कठोर जवाफ दिन्छौँ”–राष्ट्रपति रुहानी

एजेन्सी– बन्दुकधारीहरूले इरानको एहवाज शहरमा एउटा सैनिक परेडमा गोली चलाँदा आक्रमणमा परी सर्वसाधारण सहित २९ जनाको ज्यान गएको इरानको सरकारी सञ्चारमाध्यमले जनाएको छ ।

सरकार विरोधी एउटा अरब समूह “एहवाज न्याश्नल रिजिस्टेन्स” तथा इस्लामिक स्टेट दुवैले सो हमलाको जिम्मा लिएका छन् ।

सैन्य परेड भएको स्थल नजिकै रहेको एउटा पार्कबाट हमलाकारीहरूले हमला गरेका थिए र उनीहरूले सैनिक पोशाक लगाएको विवरणहरूमा जनाइएको छ । हमलामा परी अन्य ५० जना भन्दा धेरै घाइते भएका छन् ।

इरानले उसको क्षेत्रीय प्रतिद्वन्द्वी साउदी अरेबियालाई इरानभित्र रहेका अल्पसङ्ख्यक अरब समुदायले गर्ने पृथकतावादी गतिविधिलाई सहयोग गरेको आरोप लगाएको छ ।

इरानी राष्ट्रपति रुहानीले उनको देशमाथि आउने सानोभन्दा सानो जोखिमको पनि कडा रूपमा प्रतिक्रिया जनाइने तर आतङ्कवादीहरूलाई सहयोग गर्नेहरूलाई पनि जिम्मेवार ठहराइनुपर्ने बताएका छन् ।

एकजना इरानी सैन्य प्रवक्ताले भने हमलाकारीहरू इस्लामिक स्टेटसँग आबद्ध नभएको र ‘दुईवटा खाडी देशहरूले हमला गराएको’ बताएका छन् ।

इरानका विदेशमन्त्री जवाद जारिफले पनि हमलाकारीहरूलाई विदेशी शक्तिले सहयोग गरेको दोष लगाएका छन् । उनको त्यस्तो भनाइ इजरेल वा साउदी अरेबियाप्रति लक्षितजस्तो देखिन्छ ।