एक करोड बढी ठगी गरेको आरोपमा एन्फाका पूर्व महासचिव पक्राउ

काठमाडौँ– विदेश पठाइदिने भन्दै विभिन्न व्यक्तिबाट एक करोडभन्दा बढि ठगी गरेको आरोपमा नेपाल आइस हक्की संघका अध्यक्ष लोकबहादुर शाहीलाई प्रहरीले पक्राउ गरेको छ ।

अखिल नेपाल फुटबल संघ (एन्फा)का पूर्वमहासचिव समेत रहेका शाहीलाई महानगरीय प्रहरी अपराध महाशाखाको टोलीले बिहीबार काठमाडौंबाट पक्राउ गरेको हो । महाशाखाका एसएसपी दिनेश अमात्यका अनुसार क्यानडा लगायतका देश पठाइदिनेभन्दै शाहीले विभिन्न व्यक्तिबाट एक करोड भन्दा बढि रकम ठगेको उजुरीका आधारमा महानगरीय प्रहरी अपराध महाशाखाको टोलीले पक्राउ गरेको हो ।

पक्राउ परेका शाहीले ललितपुरस्थित श्री कुसुन्ती युथ क्बलको नामबाट क्यानडा लैजाने र क्यानडाको टोरन्टोमा मे १५ देखि २५ सम्म फुटबल खेलाउने आश्वासन दिएका प्रहरी अनुसन्धानबाट खुलेको छ ।

शाही नेपाली राष्ट्रिय फुटबल टोलीका पूर्वगोलरक्षक समेत हुन् । म्याद थपका लागि उनलाई काठमाडौँ जिल्ला अदालत चलान गरिएको छ ।