त्रिविका विद्यार्थीले सगरमाथा चढ्ने

काठमाडौँ – त्रिभुवन विश्वविद्यालय मानवशास्त्र केन्द्रीय विभागमा अध्ययनरत् विद्यार्थी दावा शेर्पा सगरमाथा चढ्ने भएका छन् ।

सोलुखुम्बुको दूधकुण्ड नगरपालिका घर भएका शेर्पा मानवशास्त्र केन्द्रीय विभागमा शोधपत्र गर्दै गरिरहेका विद्यार्थी हुन् । शेर्पाले सगरमाथाको शिखर चुम्ने विश्वविद्यालयको पहिलो छात्रका रुपमा विश्व कीर्तिमान कायम राख्ने लक्ष्य राखेका छन् ।

त्रिवि उपकुलपति प्रा. डा. तीर्थराज खनियाँले शेर्पालाई त्रिवि र नेपालको झण्डा दिएर सगरमाथा आरोहणको शुभकामना दिए । उनले विश्वविद्यालयको नाममा विश्वकै पहिलो विद्यार्थीको विश्व कीर्तिमान राख्न गइरहेका दावा शेर्पाको सफल आरोहणको कामना गरे ।

विसं २०४२ जेठ १५ गते सोलुखुम्बुमा जन्मिएका शेर्पा पर्वतारोहण व्यवसायमा संलग्न रहँदै आएका छन् ।

पर्वतारोहण सम्बन्धि राष्ट्रिय तथा अन्तर्राष्ट्रिय तालिम प्राप्त गरिसकेका उनले आफू सानैदेखि हिमाल चढ्न सौखिन रहेको बताए । शेर्पाले आगामी मे ५ तारिखदेखि आरोहण थाल्नेछन् ।रासस