गगन थापाको व्यङ्ग्य : प्रधानमन्त्रीज्यू, तपाईंको ‘राष्ट्रवादी घुँडा’मा कत्रो भ्वाङ पर्यो ?

यस्तो भनेका थिए गगनले

सरकारले विषादी परीक्षण गर्नुपर्ने निर्णय लागू गर्यो । आवश्यक पूर्वाधारबिना काम सुरु गरेकोले अप्ठ्यारो र झण्झडमुक्त हुने नै भयो । तर, पनि काम सहि भएकोले केही समयका लागि महंगो तरकारी खाएर होस् या तिउन बिनाको भोजन गरेर होस् सरकारको निर्णयमा समर्थन गर्न तयार भएकै थियौँ ।

हाम्रो साथ पाएपछि लागेको थियो, आफ्नो निर्णयमा सरकार अडिरहनेछ । बिलम्ब नगरी भन्सार बिन्दुमा पूर्वाधार बनाउने छ र ठोकेर भन्नेछ, ‘मेरो देशमा विषादी परीक्षण नगरी तरकारी र फलफूल भित्रिन दिइने छैन । अझ जनताको साथ पाएपछि पारीबाट वारी आउने फरफूल र तरकारीसंगै वारीबाट पारी जाने चिया र अलैँचीको पनि हिसाब किताब हुनेछ’ भनेर गर्जेला भन्ठानेको त पारीबाट आएको मन्द खोकीको आवाजले नै थला पो पर्यो हाम्रो सरकार । यति भनेपछि के भन्नु र सम्मानीय सभामुख महोदय ।

प्रधानमन्त्रीको बोलीको मान राख्न माक्स नलगाई विषाक्त हावा त सेवन गरेकै थियौँ, अब सरकारको निर्णयको मान राख्न परीक्षण बिनाको तरकारी र फलफूल पनि खाइदिउँला । सम्मानीय सभामुख मार्फत प्रधानमन्त्रीलाई यतिमात्र सोध्न बाँकी छ, ‘तपाईंको राष्ट्रवादी राष्ट्रवादी खुट्टा देखिएकै हौ, घुँडामा भ्वाङ कत्रो परेको छ बताइदिनुहुन्छ कि ?’