दाङ गढवा गाउँपालिको जनप्रतिनिधिबीचको लफडाले शिक्षक, कर्मचारीहरुको दशैं खल्लो

दाङ । दाङका केही स्थानीय तहले तलब खुवाउन नसकेपछि शिक्षक तथा कर्मचारीहरुको दशैं खल्लो भएको छ । गढवा गाउँपालिकाका शिक्षक, कर्मचारी र जनप्रतिनिधिहरुले दशैंको षष्ठीसम्म पनि तलब पाएनन् । फूलपातीबाट सार्वजनिक विदा भएकाले अब उनीहरुले दशैंमा तलब भत्ता पाउने सम्भावना सकिएको छ ।
दाङको गढवा गाउँपालिकामा करिब २८ सरकारी विद्यालयमा ३ सय जति शिक्षक कार्यरत छन् । शिक्षकहरुले चौमासिक (चार महिनाको एकमुष्ट) तलब बुझ्छन् । दशैंको बेला एक महिनाको तलब बराबरको भत्ता पनि थपिन्छ । तर, बैंक खातामा पैसा नआएपछि शिक्षक तथा कर्मचारीहरु निराश छन् ।

गढवा गाउँपालिकामा वास्तविक कारण जनप्रतिनिधिबीचको लफडा भएकोले बजेट बाँडफाँटमा जनप्रतिनिधिबीच विवाद हुँदा रातो किताब प्रकाशनमा ढिलाइ भएकाले तलब निकासामा ढिलाइ भएको एक कर्मचारीले बताए।

संघीयता लागू भएपछि विद्यालय तहको जिम्मेवारी स्थानीय तहलाई दिइएको छ । शिक्षकहरुलाई तलबभत्ता खुवाउने जिम्मेवारी पनि उनैलाई छ ।

तर, दशैंको मुखमा तलब भत्ता नपाउँदा धेरै शिक्षकहरु मर्कामा परेको छन्। ‘जनप्रतिनिधि आपसमा लड्दा ‘यसपालिको दशैं खल्लो हुने भयो एक शिक्षक बताए।

दाङका गढवा, राजपुर, राप्ती गाउँपालिका र प्युठानका केही स्थानीय तहले पनि तलब खुवाउन नसकेको जानकारी आफूले पाएको उनले बताए । तलबसमेत खुवाउन नसकेकाले स्थानीय तहले शिक्षाको जिम्मेवारी राम्रोसँग निर्वाह गर्न सक्दैनन् भन्ने देखिएको उनको ठम्याइ छ ।

‘