काठमाडौं उपत्यकाको ट्राफिक व्यवस्थापनलाई प्रविधिमैत्री बनाउन सुरु

काठमाडौं – उपत्यकाको ट्राफिक व्यवस्थापनलाई प्रविधिमैत्री बनाउन सुरु गरिएको फेसलेस ट्राफिक व्यवस्थापन प्रणालीलाई विस्तार गर्ने योजना बनाएको काठमाडौं उपत्यका ट्राफिक प्रहरी कार्यालयले जनाएको छ ।

उपत्यका ट्राफिक प्रहरी कार्यालयले स्वचालित निगरानी प्रणालीको विकास गर्दै सुरु गरिएको फेसलेस ट्राफिक व्यवस्थापन प्रणालीलाई योजनाबद्ध ढंगले अघि बढाउने जनाएको हो । काठमाडौं उपत्यका ट्राफिक प्रहरी कार्यालयका सूचना अधिकारी प्रहरी उपरीक्षक नरेश राज सुवेदीले सडकमा ट्राफिक प्रहरीको प्रत्यक्ष उपस्थितिबिना सिसिटिभी र प्रविधिको प्रयोग गरी ट्राफिक नियमको अनुगमन र कारबाही गर्न सकिने गरि फेसलेस ट्राफिक व्यवस्थापन प्रणाली सुरु गरिएको बताएका छन्।

उनले स्वचालित निगरानी प्रणालीअनुसार विश्वसनीय र भरपर्दो तरिकाले सेवा प्रवाह हुने उल्लेख गरेका छन् । त्यस्तै सुवेदीले जिम्मेवार चालक बनौँ, जरिवानाबाट बचौँ भन्ने नाराका साथ असार १ गतेदेखि काठमाडौं उपत्यकामा ट्राफिक नियमसम्बन्धी सचेतना कार्यक्रम गरिरहेको जानकारी दिएका छन् ।

सडकमा कानूनको कार्यान्वयन गर्दै दुर्घटना न्यूनिकरण गर्नु ट्राफिक प्रहरीको महत्वपूर्ण जिम्मेवारी भएकाले सडक अनुशासनमा जोड दिइएको उनले बताए । सुवेदीले सहज सवारी आवागमनलाई व्यवस्थित गर्नका लागि उपत्यकामा मात्रै १६ सयको संख्यामा प्रहरी जनशक्ति परिचालन गरिएको गरेका छन् ।

उनले स्रोतसाधन, जनशक्तिको अधिकतम परिचालन गरेर सडक व्यवस्थापनमा लाग्दा समेत नागरिकले कल्पना गरेजस्तो व्यवस्थापन हुन नसकिरहेको अवस्था रहेको बताएका छन् ।

सडकको पूर्वाधारको विकासको अनुपातमा सवारी साधनको संख्या बढिरहेका कारण ट्राफिक व्यवस्थापनमा केहि समस्या देखिएको उनको भनाइ छ ।

उनले अहिले देखिएका चुनौतीहरूलाई सामना गर्दै ट्राफिक व्यवस्थापनलाई सहज बनाउने संकल्पका साथ काठमाडौं उपत्यका ट्राफिक प्रहरी कार्यालय अगाडि बढिरहेको धारणा राखेका छन् ।