स्वीजरल्याण्डको ५ दिने भ्रमण पूरा गरी स्वदेश फर्किए सभामुख घिमिरे

काठमाडौँ– अन्तर–व्यवस्थापिका सङ्घ (आइपियू) को एक सय ४८ औँ महासभामा सहभागी भई प्रतिनिधिसभाका सभामुख देवराज घिमिरे स्वदेश फर्किएका छन् । सभामुख घिमिरे १० सदस्यीय प्रतिनिधिमण्डलसहित शुक्रबार स्वदेश फिर्ता भएको हो ।

उनी चैत १० देखि १४ गतेसम्म जेनेभामा सञ्चालन भएको महासभामा सहभागी भएका थिए । महासभामा सभमुख घिमिरेले ‘संसदीय कूटनीति : शान्ति र समझदारीको लागि सेतु निर्माण’ विषयमा सङ्घीय संसद्का तर्फबाट सम्बोधन गरेका थिए ।

सो क्रममा विश्वमा देखापरेका भौगोलीक, क्षेत्रीय तनावका साथै शान्तिमा देखिएका चूनौतिहरु लगायत जलवायु परिवर्तनको समस्या समाधान गर्न कुटनीतिक ढंगले प्रभावकारी पार्ने बिषयमा छलफल भएको सभामुख घिमिरेले बताए । त्यस्तै उनले संसदीय गतिविधिहरुलाई क्यालेन्डर बनाएर प्रभावकारी बनाउने बताए ।

महासभामा सभामुख घिमिरेसहित बिभिन्न दलका सांसदहरु संसद सचिवालयमा महासचिव लगायत सहभागी भएका थिए ।