जरिवाना पत्र नपाएको जिकिरसंगै बालेनका प्रतिनिधि च्यासलमा, एमालेद्वारा पत्र बुझ्न अस्वीकार

काठमाडौँ– एमालेले शुक्रबार काठमाडौँमा आयोजना गरेको जागरण सभाका क्रममा दरबारमार्गमा फोहोर गरेको भन्दै काठमाडौं महानगरपालिकाले जरिवाना अनुरुप तोकेको एक लाखको पत्र प्राप्त नभएको नेकपा एमालेले जनाएको छ ।

यससंगै जरिवाना असुल्ने प्रयास जारी राखेको महानगरीय टोली अर्काे पत्रसहित एमालेको केन्द्रिय कार्यालय च्यासल पुगेको छ । तर, महानगरको एक टोली पार्टी कार्यालयमा नै पुगेर पत्र दिन खोजे पनि एमालेले पनि पत्र बुझ्न अस्वीकार गरेको छ ।

यही मंसिर ७ गते काठमाडौंको दरबारमार्गमा सभा गर्दा फोहोर गरेको भन्दै महानगरपालिकाले एमालेलाई एक लाख जरिवाना तोकेको पत्र सामाजिक सन्जालमार्फत सार्वजनिक गरेको थियो ।

जागरण सभा गर्ने क्रममा सडक तथा सडकपेटीमा जथाभावी फोहोरमैला गरी वातावरण प्रदूषण गरेको भन्दै महानगरले सो पत्रमा भनेको छ, ‘फोहोरमैला व्यवस्थापन ऐन २०६८ र काठमाडौँ महानगरपालिकाको आर्थिक ऐन, २०८१ बमोजिम रु १ लाख जरिवाना गरिएको व्यहोरा निर्देशानुसार गर्दछु ।’

महानगरले काटेको कुनै पनि जरिवानाको पत्र नआएको एमालेले दाबी गरेसंगै महानगरको एक टोली आइतबार अर्काे पत्रसहित च्यासल पुगेको थियो । तर, कार्यालयका कर्मचारीले यो विषय आफूहरूसँग असम्बन्धित भन्दै फर्काइदिएको उनीहरुको भनाई छ ।

उक्त जागरणसभा एमाले केन्द्रीय कार्यालयले आयोजना गरेको नभइ जिल्ला कमिटीले आयोजना गरेकाले पत्र बुझ्न नसक्ने जवाफ एमाले मुख्यालयले दिएको महानगरले जनाएको छ । एमाले केन्द्रीय कार्यालयले पत्र बुझ्न नमानेपछि महानगरको टोली पत्र नबुझाइ फर्किएको छ ।