रवि लामिछानेको भन्दै सामाजिक सञ्जालमा एक फोटो भाइरल, प्रहरीले थाल्यो अनुसन्धान

काठमाडौँ– राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेको हिरासत कक्षमा सुतिरहेको भन्ने दाबी सहित सामाजिक सञ्जालमा एक फोटो भाइरल भइरहेको छ ।

फोटोमा टोपी लगाएका एक व्यक्ति सिरक ओडेर सुतिरहेको देखिन्छ भने उनको खाटनजिकै २–३ वटा किताब रहेको टेबुल देखिन्छ । रास्वपाका कार्यकर्ताहरु रातको सो फोटो दुई बजे खिचिएको सभापति लामिाछनेकै हो भन्ने दाबीका साथ फोटो सेयर गरिरहेका छन् । यता प्रहरीले भने उक्त तस्बिरबारे छानबिन थालेको छ ।

बुधवार रातिदेखि रास्वपा कार्यकर्तामार्फत भाइरल भएको सो तस्बिरको वास्तविकताबारे प्रहरीले छानबिन थालेको हो । फोटो सार्वजनिक गर्ने व्यक्तिको समेत खोजी थालेको प्रहरीले जनाएको छ ।

उक्त फोटो केही दिनअघि डा. निकोलश भुसाल नामक फेसबुक आइडीबाट पोष्ट भएको थियो । उनले अहिले डिलिट गरिसकेका छन् ।निकोलशले सो तस्बिर आफैँले खिचेको र कसैलाई दोषारोपण नगरेको भन्दै तस्बिर खिचेर सार्वजनिक गरेकोमा फेसबुकबाटै माफी मागेका छन् ।

कास्की प्रहरी प्रमुख एसपी अजयबाबु ओलियाले भने यो विषयमा अनुसन्धान भइरहेको बताएको छ । उनका अनुसार त्यो फोटो रवि लामिछानेकै हो कि होइन भन्ने पुष्टि हुन बाँकी छ र त्यसको अनुसन्धान सुरु गरिएको छ । कास्की हिरासतको फोटो हो ? भन्ने प्रश्नमा उनले भने, ‘त्यो बारेमा पनि कन्फर्म भएको छैन । छानबिन गर्दैछौं ।’