स्थानीय तहसम्म आपतकालीन गोदामघर स्थापना गर्नुपर्छ : गृहमन्त्री लेखक

काठमाडौँ– गृहमन्त्री रमेश लेखकले विपद् जोखिम न्यूनीकरण तथा प्रतिकार्यका लागि स्थानीय तहसम्म आपतकालीन गोदामघर स्थापना गर्नुपर्नेमा जोड दिएका छन् ।

आइतबार काठमाडौंमा गृहमन्त्रीसँग विपद् सम्बाद शुभारम्भ कार्यक्रममा बोेल्दै मन्त्री लेखकले विपद्सम्बन्धी बिषयमा सबैभन्दा बढी स्थानीय तह नजिक हुने गरेको भन्दै त्यसलाई मजबुद बनाउन आवश्यक रहेको बताएका हुन् । काठमाडौंमा बसेर नीति निर्माण गरेपनि त्यसलाई लागू गर्ने भनेको स्थानीय तहले नै भएको उनले जनाए ।

उहाले हरेक स्थानीय तहमा आपतकालीन गोदामघर स्थापना गरेर त्यस आधारभूत सामाग्रीहरु राख्नुपर्ने बताए । उनले चार वटा प्रदेशमा आपतकालीन गोदामघर प्रदेश सरकारलाई हस्तान्तरण गरिसकेको जानकारी दिदै काठमाण्डौं बाहेक अन्य गोदामघर पनि केही समयभित्रै प्रदेश सरकारलाई हस्तान्तरण गरिने जानकारी दिए ।

उनले विपद् व्यवस्थापनको विषयमा सञ्चार जगतको ठूलो भूमिका रहने धारणा राखे ।

विपद्का बेला गरिने प्रतिकार्य, राहत, पुर्ननिर्माण र पुर्नस्थापन महत्वपूर्ण विषय भएकाले राष्ट्रिय विपद् जोखिम न्यूनीकरण तथा व्यवस्थापनका लागि संगठित हुनुपर्ने उनले बताए ।