काठमाडौं- नाडा अटोमोबाइल्स एसोसिएसन अफ नेपाल (NADA) ले आगामी भदौ ९ देखि १४ गतेसम्म आयोजना हुने ‘एचपी प्रेजेन्ट्स नाडा अटो शो २०२६’ का लागि स्टल बाँडफाँट (गोला प्रथा) कार्यक्रम सम्पन्न गरेको छ।नाडा सचिवालयमा आयोजित कार्यक्रममा नाडाका अध्यक्ष, निवर्तमान अध्यक्ष, पदाधिकारी, केन्द्रीय कार्यसमिति सदस्य तथा सहभागी कम्पनीका प्रतिनिधिहरूको उपस्थितिमा गोला प्रथामार्फत स्टल आवंटन गरिएको हो। यसअघि स्टलका लागि दर्ता प्रक्रिया खुला गरिएको थियो।
ADVERTISEMENT
ADVERTISEMENT
यस वर्षको १८औँ संस्करणको नाडा अटो शोमा सवारीसाधन, अटो पार्ट्स, वित्तीय सेवा तथा अटोमोबाइल क्षेत्रसँग सम्बन्धित विभिन्न कम्पनीहरूको सहभागिता रहनेछ।
गोला प्रथाअनुसार १९ वटा यात्रुवाहक (Passenger) सवारीसाधन, १० वटा दुईपाङ्ग्रे सवारीसाधन, १७ वटा लाइट कमर्सियल भेहिकल तथा ७६ वटा साना स्टलमा ४५ वटा अटो कम्पोनेन्ट्स कम्पनीलाई स्टल आवंटन गरिएको नाडाले जनाएको छ।
कार्यक्रमका अवसरमा नाडाका महासचिव मिलनबाबु मल्लले सहभागी सबै कम्पनीहरूप्रति आभार व्यक्त गर्दै सफल प्रदर्शनीका लागि आवश्यक सबै तयारी तीव्र रूपमा अघि बढाइएको जानकारी दिएका छन्।
नाडा अटो शो नेपालकै अटोमोबाइल क्षेत्रको सबैभन्दा ठूलो तथा प्रतिष्ठित प्रदर्शनीका रूपमा परिचित छ। प्रदर्शनीमा नयाँ प्रविधियुक्त सवारीसाधन, विद्युतीय (EV) मोडल, अटो पार्ट्स, सहायक सामग्री, वित्तीय सेवा तथा अटो उद्योगसँग सम्बन्धित नवीनतम प्रविधि र सेवाहरू एकै थलोमा अवलोकन गर्न सकिने अपेक्षा गरिएको छ।
