बैतडी — बैतडी जिल्लाको सुर्नया गाउँपालिका–८ मा ठेउला (बिमिरा) र ज्वरोको संक्रमण फैलिएपछि विश्व स्वास्थ्य संगठन ( डब्लूएचओ) अन्तर्गतको ‘इम्युनाइजेशन प्रिभेन्टेबल डिजिज’ (आईपिडी) टिमले स्थलगत निरीक्षण गरी आवश्यक स्वास्थ्य सहायता प्रदान गरेको छ।
ADVERTISEMENT
असार ५ गते संक्रमण देखिएपछि डब्लूएचओ–आईपिडीको टोलीले प्रभावित क्षेत्रमा पुगेर रोगको प्रकृति बुझ्न संक्रमित बिरामीको घाँटीको स्वाब र रगतको नमूना संकलन गरेको थियो। संक्रमण बालबालिकामा देखा परेपछि सुर्नयाको केदार माध्यमिक विद्यालय, कठमडा अस्थायी रूपमा बन्द गरिएको छ।
ADVERTISEMENT
स्वास्थ्य शाखा प्रमुख महराका अनुसार संक्रमण फैलिन नदिन आइसोलेसन, व्यक्तिगत सरसफाइ, र वातावरणीय सरसफाइमा जोड दिइएको छ। गाउँपालिकाले सबै नागरिकलाई आवश्यक सतर्कता अपनाउन अपिलसमेत गरेको छ।
स्वास्थ्य कार्यालय बैतडी, डब्लूएचओ–आईपिडी र गाउँपालिकाबीच समन्वयमा प्रभावित क्षेत्रमा विभिन्न जनस्वास्थ्य गतिविधि सञ्चालन गरिएको छ। असार ६ गते प्रमुख प्रशासकीय अधिकृत, उपाध्यक्ष, स्वास्थ्य र शिक्षा शाखा प्रमुखसहितका पदाधिकारीहरूको छलफलबाट आवश्यक रणनीति तय गरिएको थियो।
७२ घण्टाको अवधिमा डब्लूएचओ–आईपिडी टिम र स्वास्थ्य कार्यालयले निम्न कार्यहरू सम्पन्न गरेका छन् :
– आउटब्रेक इन्भेस्टिगेसन — संक्रमितको संख्यामा वृद्धि भएपछि डब्लूएचओ–आईपिडी टोली घटनास्थलमा पुगेर महामारी अनुगमन तथा मूल्यांकन गरेको।
– नमूना संकलन — प्रभावित बिरामीका घाँटीको स्वाब र रगतको नमूना संकलन गरी परीक्षणको लागि प्रयोगशालामा पठाइएको।
– जनप्रतिनिधि र स्वास्थ्यकर्मी अभिमुखीकरण — उपाध्यक्ष, प्रमुख प्रशासकीय अधिकृत, स्वास्थ्य र शिक्षा शाखा प्रमुख लगायत स्थानीय स्वास्थ्य संस्थाका प्रमुखहरूसँग ठेउला रोग र खोपबाट रोकथाम गर्न सकिने रोगहरूबारे अभिमुखीकरण कार्यक्रम सञ्चालन।
– विद्यालय र समुदायमा सचेतना — विद्यालयमा विद्यार्थी, शिक्षक र स्थानीय महिला स्वास्थ्य स्वयंसेविकासँग छलफल गरी संक्रमण नियन्त्रणबारे जानकारी।
– भिटामिन ए वितरण — संक्रमित बालबालिकालाई भिटामिन ए सप्लिमेन्ट उपलब्ध गराइयो।
डब्लूएचओ–आईपिडी टोलीले छोटो समयमा उच्च प्रभावकारिता देखाउँदै स्थानीय जनस्वास्थ्य सुरक्षामा उल्लेखनीय योगदान दिएको छ।
स्वास्थ्य कार्यालय बैतडीले प्रभावित क्षेत्रमा निरन्तर निगरानी र आवश्यक स्वास्थ्य सेवा विस्तार गर्ने प्रतिबद्धता जनाएको छ।
