भारतीय सहयोगमा बाराको पर्सौनीस्थित बेंगा साह माविको भवन निर्माण शिलान्यास

काठमाडौँ – बारा जिल्लाको प्रसौनी गाउँपालिका–२ मा रहेको श्री बेंगा साह माध्यमिक विद्यालयको विद्यालय तथा पुस्तकालय भवन निर्माणको शिलान्यास गरएको छ ।

भारतीय सहयोगमा निर्माण हुने उक्त भवनको सोमबार भारतीय महावाणिज्य दूतावास वीरगंजका महावाणिज्यदूत देवी सहाय र प्रसौनी गाउँपालिकाका अध्यक्ष विनोद प्रसाद जैसवालले संयुक्त रूपमा गरेका हुन् ।

उच्च प्रभाव सामुदायिक विकास परियोजना अन्तर्गत बेंगा साह माध्यमिक विद्यालयको विद्यालय तथा पुस्तकालय भवन भारत सरकारको ३.३२ करोडको आर्थिक सहयोगमा निर्माण हुँदैछ ।

उक्त नयाँ पूर्वाधारमा फर्निचर, पुस्तकालय, कम्प्युटर प्रयोगशाला, विज्ञान प्रयोगशाला, क्यान्टिन र भान्छा सहित सम्बद्ध सुविधाहरू सहित दुई तीन तल्ले विद्यालय कक्षा कोठा सहित शैक्षिक भवनहरू हुनेछन्।

शिलान्यास कार्यक्रममा प्रसौनी गाउँपालिकाका अध्यक्ष, विद्यालय व्यवस्थापन र अन्य सरोकारवालाहरूले भारत सरकारले प्रदान गरिरहेको विकासात्मक सहयोगको प्रशंसा गरे र विद्यालय भवनहरूको निर्माणले बालबालिकालाई शिक्षाको लागि सुरक्षित र अनुकूल वातावरण प्रदान गर्न मद्दत गर्ने विश्वास व्यक्त गरे ।

नजिकका छिमेकी तथा विकास साझेदारको रूपमा, भारत र नेपाल बीच विभिन्न क्षेत्रहरूमा व्यापक र बहु–क्षेत्रीय सहयोग रहेको छ।