काठमाडौँ – सरकारका प्रवक्ता एवम् सूचना तथा सञ्चार प्रविधिमन्त्री गोकुलप्रसाद बाँस्काटाले पदबाट राजीनामा दिएका छन् । सेक्युरिटी प्रेस स्थापना गर्नका लागि स्वीस कम्पनीका नेपाल प्रतिनिधिसँग ७० करोड कमिसन बार्गेनिङ्ग गरेको अडियो सार्वजनिक भएपछि मन्त्री बाँस्कोटाले नैतिकताको आधारमा राजीनामा दिएका हुन् ।
आफूबारे प्रश्न उठेकाले प्रधानमन्त्री केपी ओली समक्ष नैतिकताका आधारमा राजीनामा दिएको सञ्चार मन्त्री बाँस्कोटाले ट्वीटरमार्फत जानकारी गराएका छन् । ट्वीट गर्दै उनले भनेका छन्, ‘मेरो बारेमा प्रश्न उठेकोले सम्माननीय प्रधानमन्त्रीज्यू समक्ष नैतिकताको आधारमा मन्त्री पदवाट राजिनामा दिएको जानकारी गराउँदछु ।’
मेरो बारेमा प्रश्न उठेकोले सम्माननीय प्रधानमन्त्रीज्यू समक्ष नैतिकताको आधारमा मन्त्री पदवाट राजिनामा दिएको जानकारी गराउँदछु। धन्यवाद ।
— Gokul Prasad Baskota (@GokulPBaskota) February 20, 2020
यसअघि आजै प्रमुख प्रतिपक्षी दल नेपाली कांग्रेसले तत्काल गोकुल बाँस्कोटालाई पदबाट वर्खास्त गरी घटनाबारे छानबिन गर्न माग गर्दै राष्ट्रियसभा र प्रतिनिधिसभा बैठक अवरुद्ध गरेको थियो ।
यस्तै मन्त्री बाँस्कोटालाई नेकपाकै सांसदहरुले राजीनामा दिन सुझाव दिएका थिए । आज बिहान मात्रै नेकपाका अध्यक्षद्वय प्रधानमन्त्री केपी शर्मा ओली र पुष्पकमल दाहाल ‘प्रचण्ड’ बीच सञ्चारमन्त्रीको विषयबारे छलफल भएको थियो ।
यसअघि बुधबार राती ‘हाम्रा कुरा’ नामक अनलाइनले सञ्चारमन्त्री बाँस्कोटाले सेक्युरिटी प्रेस स्थापनाका लागि स्वीस कम्पनीका नेपाल प्रतिनिधिसँग ७० करोड कमिसन मागेको अडियो सहितको समाचार सार्वजनिक गरेको थियो ।